ماما عفاف

إسمي عفاف، وأنا مقدمة رعاية في قرية أطفال عمان، وعندي بالبيت حالياً 5 أولاد و3 بنات، وأكتر اشي بيبسطني لما الأطفال ‏اللي بربيهم بالبيت بيحكولي ماما‎.‎
بلشت أشتغل بالقرية سنة 2017، بوظيفة خالة، واستلمت وظيفة الأم من جديد، يعني لسا ما عندي أي خريج طلع من الأطفال ‏اللي بربيهم هلأ، وأخذت جائزة الموظف المثالي قبل فترة، لأنه الحمدلله أحدثت فرق واضح في حياة الأطفال اللي عندي من خلال ‏تميزهم بالأداء الأكاديمي والاجتماعي واشتراكهم بالنشاطات المختلفة ومتابعتهم صحياً، بالإضافة لتخرجي جديد من دورة تأهيل ‏الصحة النفسية لمقدمات الرعاية للتعامل مع الأطفال من جامعة الشرق الأوسط‎.‎‎

في كتير ذكريات بهاي الفترة اللي عشتها مع الأطفال وصعب أنساها متل ما مرة عملنا خيمة وحطيناها قدام بيتنا بالقرية لحتى ‏نقرأ فيها وأعلّم بعض الأطفال اللي عندي عالقراءة، ولما اكتشفت إنهم بحبوا العصافير جبنا صور للعصافير وعلقناهم على ‏السقف بممر البيت، والأحلى من هيك لما يرسمولي رسمة وعليها شوية كلمات حلوة متل قلوبهم‎.‎

إحنا زي أي عيلة طبيعية بنصحى وبنقضي وقتنا سوا وبطلعوا الأطفال عالمدرسة وأنا برجع وبرتب البيت وبحضّرلهم الغدا ‏وبستناهم يروحوا، وبنقضي بقية نهارنا متل أي يوم فيه نشاطات ودراسة وتلفزيون ورسم ولعب‎.‎

شعوري تجاه هاي المهنة شعور فخر وامتنان لأنه الأطفال نعمة من الله وأمانة الواحد لازم يحافظ عليها، وببرائتهم صنعولنا كتير ‏من السعادة، فشغلي عبارة عن مهنة إنسانية مليانة عطاء وكتير من الحب والمشاعر‎.أسرة الجمعية فخورة فيكي وبانضمامك لفريقها، وبانتظار جيل واعد وطموح يتخرج من هالبيت الدافي‎.‎‎

Comments are closed.