"كيف الحياة بالقرية؟" كتير ناس بسألوني عن حياتي بالقرية، وأنا هلأ رح أحكيلكم عنها.
اسمي كيان، وعمري ١١ سنة، عايش بقرية أطفال إربد مع ماما جويدة وإخواني. هاي السنة فتت صف خامس ومعدلي 98.8، أنا من الأوائل على صفي وبالبيت بساعد إخواني بالدراسة. كل يوم لما نرجع من المدرسة بنخلص دراسة أنا وأخواني أول إشي وبعدين بنلعب ليغو وبنحضر أفلام كرتون مع بعض، وكل يوم بعلمهم حركة جديدة بالشطرنج عشاني شاطر فيها.
لما الناس يسألوني شو أكتر اشي بحبه بالقرية ما بعرف شو أجاوب، يعني في كتير أشياء، بحب أمي وإخواني وصحابي اللي بالقرية راشد وسيف، وبحب ألعب مع عمو بشار لأنه بعلمني شطرنج وبحكيلي إني رح أصير محترف فيها إذا ضليت أتدرب هيك، وبتسلى كتير لما ألعب كرة القدم مع عمو عبادة عشان بساعدني أتدرب وأضل أعمل حركات حلوة بالطابة، ولما ييجي آخر الأسبوع بكون متحمّس لسهرة الأفلام، بنجيب الفرشات أنا وإخواني وبنحطهم جمب بعض وبنعمل حلقة وماما بتعمللنا بوشار وحلويات للسهرة وبنحضر فيلم كلنا مع بعض.
أنا كمان شاطر بالسباحة وبالكونج فو، الكابتن قصي بدربنا كيف ندافع عن حالنا وحتى حكى لأمي قديش إني شاطر ومبدع فيها. وعندي هواية القراءة وبقرأ قصص كثير خاصة قبل ما أنام، يعني بخلص قصتين أو ثلاث كل يوم تقريباً، بالعطلة قرأت ١٨٠ قصة ب ٣ شهور وفزت بالمركز الأول بمسابقة رواد المكتبة. لما أصير توجيهي بدي أجيب معدل عالي عشان أدرس طب وأصير دكتور وأساعد كل الناس اللي بيحتاجوا مساعدة، وأخوي عبد الغني بدو يصير مهندس ويبني بيت كبير وحلو النا احنا وماما وأنا رح أعمل فيو مزرعة وأربي حيوانات وبسس وجاج وخيول.
العيلة أحلى إشي بالدنيا، أخوي وصاحبي عبد الغني هو كاتم أسراري، بدافع عني دايما بكل اشي، وأخوي أوس بعلمه الألوان والأحرف والأرقام بالإنجليزي، ومها وعبد الرحمن كمان بعلمهم وبجمّع كل ألعابنا وبحكيلهم قصص فيهم. وأخواني وخواتي اللي ببيوت الشباب ما نسيوني، عدي ونضال ولانا، بضل أحكي معهم وأشوفهم، أخوي عدي بيعطيني تلفونه ألعب فيه، وبلبسني ساعته الحلوة، وبضل أسأل أختي لانا عن التوجيهي وكيف بتدرس، وبسألهم عن حياتهم هلأ ووين ساكنين وشو بيعملوا.
وآخر إشي بحب أحكي إني بحب بيتي بالقرية وكل حدا فيها، ورح أضل دايماً مبسوط فيها عشان كلهم بحبوني هون وبهتموا فيي. .
معرض الصور
