إسمي محمد، عمري 22 سنة بدرس إدارة أعمال بجامعة العقبة للتكنولوجيا ومعدلي جيد جداً J وخريج هاي السنة إن شاء الله، فتت على قرية الأطفال بالعقبة وكان عمري 3 سنوات، وعندي 7 أخوان وأخوات كلنا تربينا ببيت واحد ولهلاء على تواصل معهم ومع إمي اللي ربتني بالقرية الله يخليلي اياها.
ربنا أعطاني موهبة الصوت الإذاعي Voice over واكتشفتها من كم سنة لما كنت قاعد مع أصحابي وحكولي كتير صوتك حلو ليش ما تصير مقدم برامج أو نشرات إخبارية أو تعمل اشي بصوتك لفيديوهات على اليوتيوب، وبالفعل أكتر من حدا حكالي هيك وعملت قناة عاليوتيوب اسمها (مفتاح الثقافة) وصرت أطور من موهبتي وأسمع فيديوهات تعليمية وأسجل متلها بصوتي https://youtube.com/channel/UC9PsO_C7uBui0G8C3SMJt4Q
فريق القرية بالعقبة دعموني وسجلت بدورة مع قناة رؤيا بعنوان الصوت الإذاعي المتميز، وبعدها سجلت بكمان دورة مع رؤيا بدعم من صندوق الأمان بعنوان المضيف والمذيع المتميز
هاي السنة خريج إن شاء الله وعم برسم لمستقبلي وطموحي إني الاقي وظيفة أول ما أتخرج وأستقر وأبني حياتي بهاي الظروف الصعبة اللي بتمر عالجميع بعد جائحة كورونا، وبحب كتير إني اشتغل بقناة تلفزيونية وأطور من موهبتي أكتر وأكتر.
بشكر إمي اللي هي سر نجاحي ولكل حدا دعمني من الجمعية من لما كنت طفل لليوم، @ولصندوق الأمان اللي ساعدني بإني أكمل تعليمي بالجامعة، وشكر خاص لقناة @رؤيا على دعمها إلي.
أسرة جمعية قرى الأطفال فخورة فيك محمد وبصوتك الإذاعي الرائع.