الشاب فيصل
إسمي فيصل، عمري 17 سنة، دخلت قرية أطفال عمان لما كان عمري 4 سنوات وتربيت فيها، وحالياً أنا طالب توجيهي وطموحي إني أكمل وأدرس قانون وأصير محامي في المستقبل.
إحنا كعيلة تربينا سوا ببيت في القرية كإخوة وخوات، ربتنا كلنا ماما عمرة، إخواني وخواتي همه سندي وعيلتي. بنلتقي بشكل متواصل وبنزور بعض وقبل كم سنة تزوج أخوي واحتفلنا معه ووقفناله بعرسه، وطبعاً أمي اللي ربتنا هي كل شي بحياتنا الله يخليلنا اياها، وقفت معي طول حياتي، كانت تساعدني بالدراسة وبتنصحني دايماً، ولليوم بنضل على تواصل معها، لأنها ربتنا وكبرتنا وتعبت علينا من لما دخلت القرية وقد ما أحكي ما بقدر أوفيها حقها.
على الصعيد العلمي والعملي، كنت رئيس الفريق المحلي لبيوت شباب عمان، اللي عملنا فيه كتير من المبادرات التطوعية والأنشطة، وشاركت ببطولة كأس العالم لكرة القدم لدور الرعاية اللي صارت في بولندا، كمان أنا بحب كتير الطبخ وبحب التصميم الداخلي للبيوت، وأخدت دورات كتيرة لأقدر أطور من مهاراتي بدعم من الجمعية ، مثل دروة مع الامديست ودورة بالأردوينو، وحابب بعد ما أخلص التوجيهي أتعلم عود وأسجل بالمعهد الوطني للموسيقى.
إحنا فخورين فيك فيصل وبكل الشباب الطموحين…ورمضان كريم عليك وعلى عيلتك.
لتدعموا فيصل وغيره من الشباب والأطفال…بتقدروا تتبرعوا لجمعية قرى الأطفال من خلال إي-فواتيركم أو الطرق الأخرى الموضحة هنا https://sos-jordan.org/ways-to-support-sos/donate-now/
